Bog svitu,i tebi uredniče!
Zaspa san ja ali moraš prizna da si se i ti ulini.Ja san zapa u nike teške vode pa moran prizna da niman baš vele vrimena za postajkiva ,a svaki put ka otvorin stranicu i vidim da se ništa vele ne okreće najden se pomalo i uvrijden jer se isto svako malo u mistu od ove sezone ništo dogajalo što je bilo vridno prizenta na stranicu neka se čuje i vidi.
Hoću van re da ni svakomu pravo ali to je formula života a jednakost ovisi o nama samima.
Nego danas san bi namisu pa je Dun Pero reka da nan u sridu Ruža Tomašić dolazi prosvitli pamet,a poklopilo se je to sa pk.Donkota kantanelom pa su i meni prošli ternci kroz život a kako neće.
Hti san napisa par rečenica,koga se tiče da se ne uvridi a koga se ne tiče da se na primjeru uviri.
Kako znate često san u điru a lito je svakomu do kasna pa san tako jednu večer hodi malo kasnije doma ka tamo kolo naše pijace pusto cihanje i šmrkanje.Na prvu san san sebi ispa primitivan jer san pomisli ko se je usri lita moga ovako nahladi pa je iz pristojnosti musur iša ostavi na pijacu?
I osta san,malo san čeka i dočeka kala se hepy ekipa bez obručića,i onda su mi proradili klinkeri .SIgurno im je tad Ruža držala samit kako izličit nahladu ka nisi nahlađen a svaku večer šmrčrš.Je svitu moj do jedan a bilo ih je 10 su naši mjesni dečki i cure.
Vrag se uvuka u ovo naše misto pokvari je jude izobisti ih je do maksimalne pokvarenosti tako da od ničega više ne prezaju samo kako bi pojedincu bilo boje.I tako u toj svojoj agoniji materijalizma zapustila su se dica koja svoje frustracije liču u drogi,alkoholu i ostalim porocima.
Mislin da niko svoje probleme ni iša izliči sa motikom ili olovkom pa na kraju i psihijatrom nego se pusti prihladi dok te ne ohladi.Daj Bože da ovo bude zadnji slučaj ali kakve su upute ne vonja na dobro.
Zato dragi oci i drage matere promatrajte malo više svoju dičicu gledajte ih u oči,njušite ko psi tragači što imaju u sebi na sebi i oko sebe i koliko trošu.
Virujem da ako istraga bude prava da će rezultati bi porazni ali još uvik će se da ništo učini.
Dok budete ovo čitali nemojte pita ko je ovi Zabadalo što u sve zabada nos nego stavite čačkalice u oči ipo danu a još boje ih raširite po noći.
Pokle je opće poznata stvar da Lumbarda po pitanju turizma kao opći pojam odavna nema turističku zajednicu ne moramo mi dozvolit da se po satelitu okreće otok Korčula sa Velom Lukom i Lumbardom kao nepoželjna turistička destinacija i to zbog radi čega nego DROGA. Ispravite ako san digo pogriši.
Leža san po kauču ubi me je ručak žena da me od gada ne more više gleda lati me ća daje mi kerpu u ruke da jun pomoren otert prašinu i evo san je jednim dilom otre a ima još samo bi za ovi pu bilo dosta.......a možda i previše.
 
       A je to,Zabadalo
 

Bog lipa moja čejadi! !!!                                                                                A što ste se pripali, je da me ni bilo odavna ali još san živ i zdrav što to i vama od svega serca želim.                                                                         Duga je priča di san bi i što san čini i znate oni lipi naš lumbarajski običaj ka si doša i ka greš ća.                                                                                    Uglavnom moglo bi se reć da su baterije pune. Ma neznate kako mi je pusto drago ka se ovako vratiš u svoje misto i ka vidiš da se je ništo učinilo i da se čini, ma propto ti serce cvate.                                                                      Do će ta dva jadna gosta pa nebi bilo dobro da svaku sezonu mašu rukom ispri obraza ko da su ih gundeji napali. A ka tamo ni da je njima vruće nego van je to " uh jope su spali zimski san". Je , je mašu oni ispri svoga obraza jer se  njihov po pitanju metle i škovace svitli ko dičja guza.                            Vidin da smo se okitili sa cvićen, a čujem da se je puno deržavnega cvića priko noći priselilo u privatno vlasništvo. Ma za što ,za samo 3 kn, jezu gada. A ništa va će po temu pitanju osnova fond cvića u pričuvi.                               Čitan ofreškanu stranicu našega meštra i vidin da je doša redar. Ja mu čestitan na koraju jer ni lako sa ovin našin svitom ima posla. Poklanjan mu spužvu i kredu da izbriše ovi nered po selu i da napiše dva slova kako ćemo ga sluša. E, čejadi moja kasno je va po odmori ove stare kosti,ču ćemo se mi još jer tek san ariva. Lipo mi snivajte i zapantite posluh je posvetilište!                                                                                                                         Vaš Zabadalo

Bog čejadi!

Evo danas u điru po lokalu osta san razočaran. Je da je vrime puno vlage i da se u kosti uvukla  ali ni mi jasno nedija popodne pa nindi nikoga.Judi se još kupaju a vas već hita posli sezonska depresija. Ali mogu van reć da boje i da niste izahodili jer se je kolo nike ure kokojevica bila toliko razžegla da je smrad bi neizdrživ.Otrovi,otrovi su opasni u zraku,dohodu sa svih strana i valo bi štogo poduze da se ne potrujemo.Sa i mi imamo jedan mali Černobil. Žeja mi je odavna bila da napišen štogo od uljari i maslinama..........                                                                                                                                                   Lipo je da naše misto ima uljaru a u ovoj sezoni moramo priznat da je malo ova jedna i da bi još jedna dobro došla. Judi su se motorizirali olakšali sebi život,smanjili padove iz skala i potrošnju gipsa olakšali Vuleti posal i sa masline sempre naviru doma a nemoreš do na red za ih učini. Čini mi se da bi naši judi  mišćani trebali ima prednost u preradi a ne čeka ako niki iz Žernova ili Puknata ne uspije ubra pa javi da neće do,ni fer posal prima onima koji su se da stvar bude boja odrekli poticaja u korist te mašine.                                      Govori se o postotku plaćanja 15 ili 20%,a ne govori se o temu koliko su za ti postotak kišali u moru ili vodi ili da stvar bude boja soli ih se ko u slane gere pa krepaju filteri od uljare i tribul se dogodi začas. Itako ka ih ubiješ iz dana u dan ko da su na robiji i uspiju do na Ražnić da se ne usmrdu onda može iza i 30%. Valo bi da se isto malo pripazi ko što donesije poradi onih koji ih danas uberu i istu večer učinu. I sa ka već imamo pogon zašto nebi od udruge učinili zadrugu,pa da se pomogne judima u otkupu uja ko ga ima viška,pa se to uje flašira i prodaje  pa se ti pinezi mogu daje oprašiva i ulaga.                               A onda bi trebalo školova jednega mladega agronoma da sve to vodi kako to gre u kulturnemu svitu.

I naravno zaštiti to naše lipo uje za kojim svi čeznu i žejaju a ne  ko da se dogodi sa grkom?????????

Predlažem da se usijane glave ohlade i ponekad prihvate savjete većine koji  ne misle kako oni već bi želili da jedan put  posal gre kako vaja za dobrobit svih nas.

Što skoriji napredak želi vam vaš Zabadalo!

Bog judi!                                                                                                    Ma evo me ,još san živ i sa ka je drugi meštar već po drugi put se osjeti usamjen moran se na krajko javi mada baš i puno niman vrimena u ovo zadnje doba. Uvik je u điru nika sezona oli jematve oli maslina oli derva i tako iz sezone u sezonu prolaze ove monotone sezone.                               Ovo bi bi uvod ,a sa malo mojih zapažanja oli zabadanja tek toliko da imate o čemu raspravja koji dan. Ma niki dan san proša na komodu sa onin sporednim puten iz jedne na drugu plažu pa mi je zapelo oko na oni prometni znak  na kantunu one kupine ,a bi bi " zabranjen tramak i vamo i tamo". Ko lud ko pametan, a i policija se tu vozika pa je baren ona mogla skreni pažnju onemu ko ih je stavja   da auti tu moraju pro pa "makar samo u jednemu smjeru". I jope i uvik se iste greške ponavjaju od istih judi. Mogli bi oni sto puti kosi poza pute,ali uvik moramo bi najgori i u sezoni i bez sezone.                                                                                                    Hoću re da dok još ni zazimilo komunalna čiistoća uzme kozu i pale pa da očistu onu zemju poza pute pa će usput se i put proširi,tako da gosti ne moraju vadi drače iz ramena ka se moraju mimoilazi sa autima.Uvik moramo bi najgori i ispada da nan jednostavno ni briga ni kako doni goste ni kako iz njih izvu  tu šporku kunu koju donesu sa sobon. Nama ni potriba da nan sezona traje duže i da svojim ponašanjem i sadržajima zavridimo da nan se turisti ope vratu a ne da govoru kako smo za sramotu roga šporki. Sa Bogu hvala imamo cjelogodišnju turističku službu  pa se neka izvolu pobrinu da nan svima boje bude.

Ima još ali o temu drugi put.

Voli vas i pozdravlja vaš Zabadalo

Bog judi!                                                                                                    Evo odavna se nismo ni čuli e sa za ono vidli znan da bi puno njih me želilo vidi ali za to ostane vrimena ne živimo za jedan dan. nego pročita san ovih dana u foje da je ovi moderni Papa reka da se ukida predpakal,znači da se pripremu škrafuni sa grisima i tiket za direktni pakal. A ja neznan čini mi se ko projde ovi pakal na zemji da bi moga bi oslobođen onega Luciferovega ognja. Bi san ču da je gori jedan sekund kakodoli sedan dana najgorih muka,pa sa se zamislite neva čini zlo jer se dobro dobrim vraća a od zla stradaš ka se najmanje nadaš. I što je najgore ne vraća se tebi nego dici tako da još više patiš.Neva bi tverdoglav ko ona naša izvorna beštija zvana mazga poslušaj savjete ako ne starijega onda iskusnijega. Zalud ti svi fakulteti i pušte študije ako ih ne znaš upotribi tamo di tribaju a uz to se još praviš pusto pametan. Neva sla drugima inšpekciju i domaćima podmeća kopita.neva svojata ništa što ni tvoje pa ni pomorsko dobro jer još se ni rodi ko je koncesiju na to dobi(od Solina do Ražnića judi mogu prohodi i kupa se di je njih voja,jeli s tim da je istočna strana poželjnija za one koju hoće da ih sunce cile obajde) zato terpeze,banci,(mislin na one betonske) ,betonaža seka,mosti mali veliki,skalini betonski da furešti nebi zbrišali, pa ono ko fol prikolica po prikolica šuta u more pa parking reste i reste pa kuški što čuvaju prolaze nažalost ima dvonožnih i na četveroplug i još vele tega što svak misli da more čini što ga je voja. I još ništo pri grobje stoji znak zabrane kamionima sveukupne nosivosti 10 tona, stoji tamo ali kako da ga i nema Griža i daje goni materijal još su gosti po selu i datum još ni bi isteka za početak radova a pikameri i štemerice u svu šesnest. Pa eto judi se osićaju komodnim i slobodnim jer nema ni reda ni redara u mistu,a nama ostaje se nadat da će bi bojekad ni gdje neznamo možda ka projemo ovi pred i pakao na zemji da će nam bi lipše i boje na drugemu svitu. Izvinjavam se svima ko se u ovemu naša ali dok svak isprid svoje kuće ne bude me nema nam bojega ni za misto. A što se metle i metenja tiče u sledećem nastavku.

Skužajte,voli vas i pozdravlja vaš Zabadalo

Bog čejadi moja! Svanula je nedija .lipo vrime, ali tužno raspoloženje,tuguju judi i priroda. Ne, ne ni isto ko druga jutra,fali nam Tomislav i njegov mladenački pozdrav. Eto koliko san god iskustva proša, ka se ovake stvari dogodu stisne mi se srce i duša ovi pu toliko da se nisan osjeća spreman po za sprovodom.Želi san nekako da mi u sjećanju ostane kako ga pantim iz života,vedrega i nasmijanega. Eto mladosti moja pantite ga i vi ko brata prijateja rođaka   Ali najviše ga se sjetite ka pojete sest za svoje makine.Sjetite se da je život najvridniji dok je na dvi noge.                                                                          Neka ti je Tomislave laka zemlja i neka ti je pokoj duši.                                Budi sretan sa anđelima u njihovom kraljestvu nebeskom.

In memorium, Zabadalo                                                                                   

Bog judi!

Mala pauza ,ali ja san jope tu i kao prvo ovi nekulturni  i isfrustrirani duh prošlosti moga bi posjeti lucifera i zauvik tamo i osta. A sa gremo na jednu malu ištoriju koju mi je pri par dana ispriča mali Gojko.Lipo i drago dite uvik raspoloženo za se javi i za ćakulu. Ali ti je dan nikako proša nimo mene bez riči a meni se pričinilo i da malo kriva,pa san se ovi pu ,neka bi mu moga bi dida, ja njemu prvi javi,ej Gojko što je i di greš. Znate vi već onu našu pošpitalicu,kako to već gre. A on mi je onda ispriča što mu se je dogodilo ka se je bi kupa poj skulu.Govori on da se taman pripremi za skoči u more a iz pričuve skoči dalmatinac(svi smo mi dalmatinci ali ovi je bi na četri noge) Baci mu se u prsi i  Gojko doleti na škinju u seke.Govori da je dobro proša a da mu se zamalo falilo da mu se i glava i ni naslonila na jednu od njih. I tako van je on meni to ispriča i nastavi kriva pu butige nosi boce za kupi sladoled. Još od ovega lita san ču da dotični dalmatinac more dobi naslov ko šegrt Hlapić jer i on ima čudnovatih zgoda na koje se njegovi gospodari i ne uzrujavaju vele. A, ja mislin da je obala svačija i da se kuški ne moraju blesira da latu nepoželjne kupače di im ne odgovara da se kupaju. Svaka čast svakomu ali  seke su i more svačije!!!!!!!!!!!!!!!. Slažete li se i vi savnun???????Rane će zacili,špagot je osta a mi budimo judi bar ka su dica u pitanju. A sa se javjan ko kulturni reporter i par riči sa humanitarnega koncerta koji je sino bi u gradu a odnosi se je i za potribe Lumbarajske dice sa posebnim potrebama. Ukratko bilo je lipo, a čejadi da ni moglo bi više,moglo je. Pivale su klape ,zato san najviše i iša jer mi je ta pisma uvik bila pri dušii mogu van reć ne zato što san iz ode nego općenito da su naše ženske izvele najkvalitetniji repertuar. Svaka in čast.

A,jesan se razveza,bilo bi dosta za ovi pu,voli vas i pozdravlja vaš Zabadalo.

Evo me na, ma propito san iznenađen brzinom micanja dasaka, ali to ni ništa za se čudi i da su još tamo ostale kojo vrime pa vidite da nan božićni anđelići stoju od Božića poverh takozvanog centra, pa mogli su i daske dočeka novega Grašota. Za večeras niman više vrimena pa se uskoro čujemo u većem izdanju,obeća san van par kurijozitadi.                                                    Bog Zabadalo

Bog svitu!

E, da da se i ja obratim  pučanstvu u vezi Grašota.To van je tako reka san ja  ka ni nikoga udri taroka  a kaki su što činu osin što plaću primaju, ka isti udaraju a ka će se štogo promini moremo navi uru po njima, sa ka je doša Grašo ,a bilo je boje na Velu Gospu, e ni se moglo tanca od one dičurije ,a ni se moglo ništa ni vidi od njihovih ručetina u zraku.Ka van ja govorin da smo pasji narod i da se još ni rodi ko bi nan ugodi. Ali sve u svemu bilo je super i profesionalno odrađeno. Nego niko ni poprati proslavu dana općine,bilo je zanimjivo ču već uložene investicije a i planirane,eto kako izgleda da će drugo lito bi manje gužve u centru,asfaltirat će se zaobilaznica do kraja godine. Pohvalno ,pohvalno vidi se da se ništo rabota. Podilili su se  i priznanja  Don Perotu, malemu Nedotu Agi,Antetu Zecu i našemu Veljkotu. A sve je to začini naš misni zbor,svaka in čast ,i njima je lito učinilo svoje ali što ih je manje to im boje gre,samo naprin. Govorite da lito tek počinje ,morebi po vrimenu,ali već se danas vidi da se osu dobri dil. Ma ni nan ova sezona alavija ni počela a već je pri kraju,špica jun je durala dreto deset dana. A dura će i ubuduće i manje ako ovi naši isfrustrirani i nak.....i motoristi i automobilisti budu provodili svoju nekulturu i samovoju u kasnim urama ,tako da ne dadu usni ni domaćima ni fureštima. Ja bi ih ovin putem moli da reli stazu primistu van mista a mogli bi i stavi pamet u glavu jer virujem da ljudski život na motoru od Lenge do Javiča pri razvijenim brzinama justo je ravan nuli.A ka se dogodi svak je kriv osim onega ko pameti za se nima. A naši dragi zaštitari su rekli da su to prevelike brzine da bi ih oni mogli zaustavi, bi ćemo mi kokoši. Ko da oni ne znaju ko su autori brzina. Ali zato će plati dundo Lovre Musa što nima kacigu i njemu slični.....jeli tako?Za ovi pu toliko,vidimo se u sljedećoj epizodi.

Vaš Zabadalo

Bog judi!

Najprvomi je drago što su se uvele novitadi i što će ih još bi. Ja san u poslu i niman ka vele vrimena sidi za ovu mašinu,osim što navečer pročitan jeli se slučajno koji turista zabranka za moj apartman,pošto smo već rekli da se nimamo na koga ozira,va se snahodi sam kako kod znaš i umiš za sramotu našega mista i naše propagande. Ovo je dobro što si pozva ugostitelje da se izjasnu kakva je bila sezona ali ne živu samo oni od turizma nego svak u ovemu našemu mistu direktno ili indirektno živi od turizma,zato bi se svi trebali izjasni od sezoni. A,moje je mišljenje, pošto i ja direktno živen od turizma, da bi turistička zajednica ,općina svi iznajmjivači i svi privatnici trebali potpisa ovo godišće jednu veliku peticiju da se ovo lito i ova sezona proglasi elementarnom nepogodom. Posli na kraju lita slušat ćemo statistike o pustima noćenjima i ostalemu, a koliko je judima ostalo pinezi u takujinima o temu niko ne vodi statistiku. U unutrašnjosti ka zadaži, poplavi, opali grad i sl. odma županija dotira odštete. A u nas ka zarosi kako niki dan pa bude red za odlazak do Eme,ko te pita . Ako se mi ne izborimo neće ti niko da a pita hoće i porez i taksu i ostale obaveze. Zato ko je za te stvari nadležan, neka malo ovi pu stopli katridu i potrudi se da štogo učini za ove jude koji ode živu. Za sad toliko ,kasno je i va po ove dvirti ure do jutra ubi oko i napuni baterije. Samo da van rečen da san na puno mista zabada i puno tega obazna, sve će do na red,pa vjerojatno će mi Bruder jope začepi gubicu, ali uvik ostane mista za napisa dvatri slova. Budite mi pozdravljeni u ove zimske litnje dane i noći

Vaš Zabadalo!

Bog judi!                                                                                                          Najprvo da vas pitan kako podnosite ove vruće dane  i posle oko naših dragih gosti koje jedva čekamo,a oni nikako da doju-zalipili se za balun i bog.? A i ovo malo što ih ima,nismo im se potrudili ništa pokaza a nisu oni krivi što ih je malo. pa će te se i vi malo zapita di je litnji kulturni program,di su ribarske večeri,di su Lumbarajske uzance i što je cili zimu činila turistička zajednica,osim što je primala plaću. Ala moji da malo se movite nemote uvik kaska za drugima. A svi se već pitamo i ovega godišća,kao i svih prošlih godina hoće li man ariva koji gost priko turističke zajednice ili će se i daje nastavi na upit gosta za pomoć pri smištaju,da ga se nekulturno i bezobrazno odbaci sa izjavom da sam traži. To van govorin jer mi je to gost reka posli razgovora sa njima.Ne služi to mistu na čast ni judima koji tamo rabotaju. E,znan reće oni da oni nisu turist biro,ali nisu judi ćoravi i glupi pa da se ne vidi komu je lito popunjeno i za koga se radi ka turist biro ,a za koga su turistička zajednica. A sa mi je sinulo da možda judi koji rabotaju tamo i ne znaju di ko stoji jer bogu hvala nika se ni dogodilo da nan misto u turističkemu pogledu vodu judi koji se nisu rodili u Lumbardi kojima ovo misto ni pri sercu i koji tu sidu samo zbog dva halava solda,i svojih intersesa.. Nemote mi reć da u mistu nima sposobnih čejadi??????????? Ovo lito jope doli nike nove face,a bibi ja i moje dite zaposli ali nisan susri nigdi natječaj . Posal bi bi pravi ka bi oni svi doli rabotali bez plaće, a ne samo za interes pa bi vidili kako se nebi tiskali. A uspu nemore se rabota i ka judi doju prijavi goste da službenik gleda utakmicu na terasi,skužate me. Može me urednik stavi i na stranicu i na čat di go hoće, jer svi znamo da je ovo ovako i da bi se to smista tribalo prominit,da se niko ne idi. I daje imamo halavo misto!!!!!!!!!!!!!!!!!!!!!!

Kasna je ura va po leć,Stojte mi dobro do sljedeće epizode voli vas i pozdravlja vaš Zabadalo

Bog judi!

Evo me, nikako uspivan sve ove puste obaveze pridsezonske polako prini kraju.U ovun epizodi malo ću govori o odgovornosti jer mi se para di se go okjrenen da je usuda ko zmija utekla u meju. Kako van je već poznato da zabadan tamo di puno njih nebi želilo tako san i ovi pu prispi na jednu priču koja kako mi se para ni trebala bi ispričana jer je bila praćena porugama i podsmihun. Sasvin slučajno poznan jude,ne tako dobro ali ih isto poznan  i čini mi se da baš ne miritaju tako ništo.      Evo kratki uvod pri priče. E, prin par godina nekoliko judi se odlučilo sastat i svoje glasove uskladi pa se sa njima digo po i prizentat ,a najviše je njima to godilo. e,lipo se bilo uputilo pripovida , ali ni dugo trajalo jer ka je trebalo da malo više žrtve i uloži malo više odgovornosti bez materijalnih dobitaka ode Marinko u penziju i ne samo Marinko nego je isposlova penziju još dvojici.

Ostatak se pomalo obnovi i nastavi radi i sa od svojih bivših kolega biva izvrgnut porugama i ismijavanju i govorenju da se nima pojma od pervega,bidan un najviše je ćapa pa do zadnjega. A mislin se ja di su tebi bili muda pa da grizeš gloginje i piješ šampanju ruku pod ruku??????????????? Eto vidite kaki smo,sve va uništi,razori i omalovaži sve samo da se ne gre naprin,a pitan se zašto i jeli takav triba bit? A sve zato jer se nima odgovornosti u ničemu. E moj Servantesu,govoriš da je lako pod šifrom pisat i pripuntavat, ni viruj mi bilo bi lakše reć ovo komu u gubicu,ali za sa je ovo prilika da se pripozna i da priuzme svoj dil kolača nase pa da više ne drobi.

Palo mi je napame,a možda je jelozija ona isto zna bi gruba žena,što vi mislite an???????                                                                                    Zabadalo

Evo me,daši!                                                                         E,moja dragunasta4 govoriš za letriku ocjena 2 i govoriš da bi valo stavi nisku letriku,a ja te pitan di morebi na kreške od lozja.Točno je da va štedi prirodu ali ka se zna kaki smo judi(pitanje je jesmo li uopće judi) ova je akcija bombon. Govorin to zato što se ni moglo ovih par stupića postavi bez prepirke i bez zabrane i govora i suvišnih riči,pa kako ćemo onda daje? E,voli bi i ja zna jeli proradila kanižela.to van je ona stara ko ne plati kurvu va da plati likara. E, moje Žrnovo ka si već iz Žrnova  da bi ti prst s kojin pišeš da si s nama u govnima,ali ode di smo mi i di bi valo da svi ostanemo. Mislite li  vi da bi naši mergijanti na putu za javnu letriku pristali da učinu ogradne zidiće u dalmatinskom stilu gradnje,pa da ova šetnica stvarno sliči na ono na što bi trebala sliči???????????????????  Misli san završi,ali ne mogu bez još jednega uboda. Ka se pokosi trava poza pute onda bi trebalo uze metle i pale i kozu i par ruka pa ka se to sve skupa udruži tek onda puti izgledaju čisto i uređeno bez one nagomilane zemje poza meje.

Eto laka van noć,Vaš Zabadalo!

Bog judi!

Najprvo vas molim da se neka niko ne inaje uvrijen,to van stalno ponavjan u mojim epizodama,jer to ni cilj mojega dopisništva.E,sa moja draga Lumbarajka svaka čast da si se javila makar da se svaki dan što više nas javja onda uredniku nebi bilodosadno i monotono,a mi bi znali što nas muči i morebi bi znali i kako riši probleme. Istina postoji u komentaru da su plaže svačigove,ali sa se moran nadoveza da je jedno bilo ka je postojalo bivšo zajedničko poduzeće koje je hranilo puno fameja pa je moglo i traži da svi skupa usadimo cviće i pokupimo smeće bilo to iz plaža ili ispri kuća ili u centru. Ali sa ka je došla privatizacija i globalizacija, sa  ka su natječaji u điru pa bili oni zakoniti ili ne zakoniti,pa na bilo koji način ko se uspije uvali on je pobjednik.Tako se to kod nas čini pa se tako i misli i zato smatran da ni uredu da se o ovoj temi tereti svih nas. Iz prostog razloga ko se doje banja na bilo koju od plaža virujte neće mu se dat hodi na drugo misto ist i pit pa se sad na ovo neka nadovežu moje pripovisti iz prošle epizode. A što se igraški od igala tiče moj kratki komenat je da dokle god nam vrh pokrije take stvari nika se tega zla nećemo oslobodi i jedino što nan ostaje je Boga moli da se to ne dogodi tvom i mom ditetu. E,da moja draga Lumbarajka pišeš o egzistenciji, više me puti boli glava od nje možda je za moju već kasno ali boli me za našu omladinu diće i ku će i kako će,a sa druge strane stvarnost je da im je mi moramop dat jer da se za njih niko neće pobrinu a posebno ne političari,njih apsolutno ni briga nizašto osimza svoju g..........Uvalili su nas u morsu i sad stišću i muzu na svakemu koraku. Večeras je došla politika u moju butigu i to neva.Eto malo smo se dopisivali , javi se digo još koji pu pa ćemo ćakula. Vela je ura, va po leć jer sutra jope lozje zove(a gruba ti je ova stajun). Lipo moje malo misto neka ti bude laka noć,voli te Zabadalo.

Bog judi!                                                                                              Evo san se vrati iz daleka svita,propto san se zaželi ovega našega lipega mista neka je jadno,šporko i neuredno ali jope nan je pri sercu.E pa malo san lista po ovoj našoj stranici i vidin da san dobi i ženu Zabadalicu. Moran joj se iskuža ali kako me ni bilo nisan moga poprati bivšu rupu,ali zato sad dajen na znanje da je nova rupa na pomolu i to ravno ispri restorana na Bilinžalu. E da ona Ramotova betonizacija ni uspila odoli materi prirodi. Nemogu sa ferma ka smo na Bilin žalu kojega danas posli dažja ni ni bilo,kako je uputilo iz godišća u godišće ja  nevem di će nan lipi a gosti a jemci derža šugamane. Daši da umisto plaže i peržine ispod meje je osta red smeća plastičnih botija,katrana.Da nebi ispalo da čin san doša da san odma poče meća kritike ,moran reć da bi bi red  da plažu održava oni koji od nje i živi.Nema više Druga Tita ni radnih akcija!!!!!!!!!! A,onda gledan oni most kako ga more sve više ubije i ruje. Možda nebi bilo loše malo se pozabavi sa njim i dat mu lice i naličje kako mu mirita. Iskreno da van rerčen da san misli da se je štopomaklo iz mertve toške, sezona kuca na vrata a još je sve krepano. Voli vas vaš Zabadalo,

Evo me čejadi moja,smerznu san se.                                                   Parimo sa ka iz onega filma zameo ih vitar, morate prizna da se niste nadali ovakim vrimenskim neprilikama u ovu stajun. Iman koju godinu i koliko me pamet služi uža san se priko dana znoji sa motikon u zemji a sa jadan ja još ni vrag jednega rasada nisan usadi a o ostalemu neću ni govori. Eto ome je vitar i daž jude,po običaju ne čini se ništa pa će posli bi frke i strke(e,maca će furešti rukave o klak i pituru).Znate što van hoću ri? Sa ka zatopli va će nan svima skupa zagrni rukave i ćapa se posla jer mislin da je bilo dosta paranoje (ko što urednik reče )A moran primjeti da bi se ovi bokuni prošlosti mogli zamini sa novima, ako nema mista za nadodavanje. Eto morate se nauči da je ne mogu proć a da štogo ne zabadan,zato se i zoven Zabadalo.

Bog judi ! Da,da ko je bi samnu sigurno će i složi da je dičji krnoval uspi. A nikako su se svi ćapali kolo tičje gripe pa su tako bila i dva krnovala tj.jedna itica i oni drugi koji je lati zaražene tice iz njega .A, poznato je da je dičja mašta neiskvarena pa san tako se od srca uspi nasmija,i sa bi bilo dobro ka ja nebi bi ja tj Zabadalo i ka u svemu temu nebi kroz crte uspi vidi da su u tima osudama ma i otac imali umišane perste.E, da moglo se je točno razazna di i što koga muči.Ali neka zato postoji krnoval i zato se kroz cilo godišće priprema zašto će ga izgori. I ko što urednik kaže počela je korizma i on je smisli čega se je odreka, a ja još mislin. Ni to uboga puno dana,ali cilu se godinu ničega odričem bilo milom ili silom,pa još nisan uspi smisli nešto da ne bude baš pririgorozno.Ova nam buduća (suđena oli ne suđena vidićemo na kraju)Evropa pomalo ali sigurno uvađa korizmu kroz cilo godišće. A kad smo već kod Europe moglo bi novo pitanje na anketi bit. Kako lumbarjani dišu za evropsku uniju? Mislin da bi ti referendumić bi interesantan. Kasna je ura,va po leć.Vidimo se u sljedećem broju a do tad vas pozdravlja vaš Zabadalo ,i poručuje budite ustrajni u svom odricanju.                                         Zabadalo

E,da, dobar vam dan u ovo promjenjivo nedjeljno popodne.Baš ko što ova vejača minja prognoze tako se i naše raspoloženje minja,teška debuleca.A,neznam zašto bi te kritizirali, ka čovik nezna o čemu bi pametnom pisa, osim da i on kritizira.Ali eto ako samo na takav način pali ,nećemo to nazva kritika nego sugestija.Možda se tako lakše prihvati i sa manje povrijeđenosti učini.Pa gremo ća, lipo je učini đir kroz misto ali je grubo godinama gleda kako je misto šporko pa šporko pogotovo ka se gre iz centra pu Pržine. Ni to da je smeće,ali zašto se ona zemja i trava poza put nebi mogla sa kozom i dva radnika i dvi pale očisti i skupi. Nemoj mo se zavarava da će to judi sami od sebe očisti,jer još nema dovoljno razvijene svijesti u našemu narodu. A da budemo i pošteni malo ko da  se ne konta da je to javna površina i da je neka čisti oni ko je za to plaćen. Pa narode moj dragi budite vridni i očistite to malo da nam ovi turisti što će uspi do ovo lito do nas ne gledaju svaku godinu istu priču. A sa san dozna i jednu kulturnu vijest. Niku večer ka je puhala bura ču san jednu klapu kako kanta vanka. Uspi san ih iz đira ćapa pa san ih pita što in se je dogodilo da se mrznu vanka. A to van je bila naša ženska klapa Psefizma,pa su mi rekle da se pripremaju za audiciju na festival klapa u Omišu koja će im bit 10.03. Ako uspijem dozna kako su prošli pa ću van napisa. Očito se vidi da je nedija i da se nema što čini pa san se ode raspisa,a sa gren ća jope u đir.

Bog van ,Zabadalo!

Bog judi! Pita urednik dali se je štogo danas dogodilo novega u našemu malemu mistu? A, ni sve je po istemu i to nam ovu zimu iz zime u zimu čini to monotonijom.Čini mi se da je svakomu ovega ništavila puna pipa a usporedo niko neće ni da repom makne za promine (čeka onega drugega). Naš vam je život sa ka naš kampanel, srce kuca (ure zvonu),a ništa se ne dogaja (kazaljke su stale).Možda ka se one pomaknu da će sinu koja koja nova ideja.  Bog vam, Zabadalo!

Bog judi!

Evo me jopeta,malo me ovi pusti dani od pustih nedogađanja čine malodušnim,ali nesmimo se pusti jer će nas ovi brzi avijon od života prignječi. E,gremo ća štogo rabota. Svako božje jutro a zna se dogodi i u pojne i prikvečer pasajen mimo naše Lumbarajsko usko grlo. Pa drž ne daj ,pa daj žmigavac pa ko će pri pro,pa još zaboje trefi autobus pa se sve to skupa začepa ,pa ka je sezona ti čep proje i u tanko crivo. A onda di si ku si tu i stoji i budi sretan da ti u autu arbajta klima. Samo ne znan što će nam iz godišća u godišće reć naši lipi i dragi a gosti jemci.Pa što bi valo učini, valo bi to naše usko grlo operira izvadi mu bokune da se dobije proširenje koje mu je dala majka priroda,i da promet teče kako bi treba.

A more bi da vi znate di je u našemu malemu mistu usko grlo,an?

Bog judi !                                                                                               Pusti sam vas malo da se odmorite,ali ja ne mogu bez zapažanja. Mora se pohvali,radi se ,radi se - ali uvik se može i boje rabota. U mene su doma miri od neretvanca,i da buden pošten da sam se iznenadi kako je ono liziri žal,što ga stavju u most,aka san vidi koliko tek cimenta stavju na mišalicu,pravo da van rečen ,morske struje nemaju baš fidel temej. Toliko o mostu a sa ćemo malo o grobju. A svitu moj ono nan je obraz mista, a pogledajte samo kaki je ? Najprvo sa ovi zid je dobar za prvu pomoć ali ni ga bilo boje obu cilega u bunju da ne izgleda ko što je sa.To je sa te strane od istoka ,sa juga onako uvečer bez javni bez kamenega ili zelenega zida svakomu ni sve jedno pro. A zapadna strana je koma, ni zida ni javni. Okreću se autobusi, kamioni i viljuškari (a jadan Bavčević) ,znate što hoću ri. A onda naknada za grobje dohodi redovno a grobje se kosi za Svih svetih i onda se pokvari kosilica. Živice po jarulama su kako komu pukne. A moglo bi se od te naknade kupi pa da se usadi da svima bude isto. Naplaćije se odvoz smeća iz grobja a u kontanjerima  stari namještaj, špaheri, frižideri, biće to Bog im da pokoj naši mrtvi da prominiju inventar po stanu. Budimo judi pa za tu naknadu komu je to red neka uputi i upravi da se štogo i čini.

Eto neka se niko ne inaje uvrijen , voli vas i pozdravlja vaš Zabadalo

Slava Bogu da smo opeta svi na broju. Bog ! Bog! moj svitu.                  Jutros ka san se prošeta doli do centra, ajme meni misli san da mi se je poremetila koja duga ka san vidi velika bila slova na putu ispri Dišpetozne Marice. Je,je misli san da je leva u điru,ali mi se je isto činilo da je ništo ovu godinu poprišila. E,ma ka san dozna zašto je trebalo uze pinel i klak-moja mladosti svaka van čast. Ko nezna ,u ovo naše malo misto koje je već dobro zasađeno travom zelenom, misli nam se uvuć jedan od veloluških velemajstora drogaša,otvori kafić i trova nam dicu. Ja bi vas pita dali ste vi sa tim kuntenti, dali će naša općinska vlast dopustit da se ništo tako dogodi ili će mu se lipo zahvali i reć da je njegova adresa u Veloj luci. Lipo svi promislite komu je za misli.Neka van ova bura razbistri možjane da možete pravo i skrušeno.................. Trebalo bi možda raspisa jednu internetsku peticiju po pitanju ovega slučaja.Ovaj put se nebi smilo gleda  što će ko dobi od tega, nego ko će što IZGUBI.  Budite mi pozdravljeni ali ne i zapostavljeni . Recite i vi svoje mišljenje,ali kako treba jer oni chat nema baš nekega smisla. Javljajte se, pa se možda i nekad nađemo za pametno sutra.  Vaš Zabadalo.

Bog judi!                                                                                                        Moj je urednik misli da su to vjetrenjače,ali kako vidite ipak nisu.Obe dvi buže su zakrpljene.Bi je reka jedan čovik ženi da je va istaroka ako će štogo učini.Izgleda da se ode radi o istoj stvari. Bilo kako bilo tverdo mi je drago da se uredilo. Sve me ništo kopa da se vratim na ono blagdansko i praznično vrime jer mi nikako ne gre u glavu da je to odavna odmaklo.Evo još stoji slika nešega malega okićenega mista,prva liga, ali pitam se di je ono raspoloženje judi kakvo je bilo pri. Družili su se judi, nisu bili zavidni ni mrzeći jedan prima drugemu,čini mi se da nisu bili toliko izmaterijalizirani ko što su danas. Nemote se vi vele uznemirava,ni to samo ode problem. Posal me je u te dane nave u grad pa gledam plokatu u deve uri ,šetaju par judi ko da si im stavi uzde od konja  a žurim, a prišim, a nema ni kako si  ni disi - gotovo.A onda u slastičarnice veća gužva nego u mesanicama. Pita ćete se zašto? Gospoje sa kupuju slajko i primjeti sam da malo iz koje kuće je u to doba vonjalo slajko. E baš sam pravi zabadalo i sa mi je još ništo došlo napame.Dašeno ka je bila badnja večer,sićan se peršurata, vina, mesa zafrkancije i pisme.A sa tri čovika i troje dice,berači su ga užgali i nestali, nema ića i pića jedva da kogo rič reče a kamoli da se kanta. Pomalo se gubu običaji, a to judi moji ni dobro.Bili smo najsritniji izgleda ka smo na tovare idrili,u kominima se ko pršuti dimili i zeje sa lardom iz jedne teće ili.Nebi bilo dobro da se to vrime vrati ali ako ovako nastavimo ništo će nas mora udri po glavi,jer obisti, nenavidnosti i trave ne fali. Ovu godinu sam ja razvrživa bor ,pa sam sam sa sobom razgovara  i misli kako mi se čini da je ono bilo jučera ka se je kiti.Itako judi moji vrime leti i mi za njim, ali ga nikako ne možemo ćapa za rep,jer svaki dan je tempo tobrži.                                            Bi ćete se umorili čita ,gren ća.                                                              Smireniji nastavak života želi vam vaš Zabadalo.

Bog judi, bog uredniče!                                                                        Nadan se da si napuni baterije za nove radne pobjede i baš mi je drago da si se lipo prove kod naših susidi olitiga jarana.Sa gremo ća za poslom. Stavi ovo u koju god hoćeš rubliku, samo bi mi bilo drago da kogo mrdne repom. Na putu stoji velikana rupa, a u rupi su se učinile male rupe, koje su se od ove neregvardane kiše napunile vodom,. A događa se to da čovik ne može pošteno ni pro a da mu drugo auto ne smokri gnjate. Toliko o gnjatima, a što se tiče  auti i motori i oni bidni stenju ka moraju pro priko boki falsih, a onda na kraju jadni naši bubrizi,doju u gućavac,ko ima slabije amortizere, a oni koji imaju boje i njima će uskoro oslabi ko budu još malo morali prohodi priko rupe. A, što se druge rupice tiče,tj. one ispog započetih Butarinih garaža, valo bi isto povest računa zašto se je otvorila. Valo bi da se kogo kala zaviri vidi da možda more ka udara ni potkopalo put. Sa pari bezazleno ali ako metastazira  operacija će bit gadna. Bogu hvala imamo velikih kongulari pa moji dragi komunalci pošto vas je svakin danom sve više ,zagalite rukave i u nove radne pobjede.

Nemote mi zamiri, vaš Zabadalo!

Dragi uredniče!                                                                                        Nećeš mi se idi,ali ka nam je već misto ovako lipo okićeno moga bi se po mraku prošeta i letra kako to izgleda .  Znam da zebu prsti , ali virujem da bi naši iseljenici i drugi koji prate našu lipu stranicu bili oduševljeni. Možda bi nam to bi jedan mali plus u njihovima lentama,jer opće poznata stvar je da oni žive na Marsu ,a mi ispod zemje. Ašto se pameti tiče ,uh, to je posebno pitanje???????  E, ništo mi je skoro izmaklo, što se tarokade kićenja tiče a to je da nam je i ovu godinu kampanel osta neokićen. Danu se gaštardo  i ostali brigadiri složite pa da i to bude jedan od rišenih problema u nizu.                                                                                                           Zabadalo

Bog judi!                                                                                      Zaintrigira me je botaničarev kutak, i mogu vam reć da u našemu malemu mistu stvarno niko ne rabota ništa za ono za što pineze prima. E, ima ima stvarno ukrasi od auta, baraka ,prikolica  koji će ako bog da da se sredi zaobilaznica ,lipo ukrašavat trotuar. E, a što se betunacije tiče to je posebna pripovist. Ja stvarno neznam kako se može dopustiti da se betunaju  naše lipe seke ,što ih je priroda dala. Kako se može pustit da se gradu mosti kako je koga voja i di ga je voja? Ima mista u mistu di su judi prisvojili seke,betonali ih ,nalili betonski stol i banke i normalno što već gre uz to susid susidom ne govori ,a ostali mišćani ne smiju ni prismrdit tu za se skvasi jer će u protivnom bit izjureni. E, a imamo mi i neboderi u mistu što se gradu  ko da smo u Navijorku, i izgleda da im naše vlasti ne mogu ili( neće) da stanu na rep.Judi moji ne obadaju oni ni lokalne ni građevne dozvole a ni prostorni plan. Uvike se može nać način da se nered uredi samo treba zavrni rukave do ramena!!!!!!!!!!!!!!!!!!!!!!!!!!!. Kasno je va po leć, mašina mi je bila u kvaru imala je tičju influencu pa se ni moglo ćakula  a sa je prizdravi pa ćemo nastavi drugi put.

Voli vas i pozdravlja vaš Zabadalo.

Kako se ljudi pa tako i lokalne nadležne institucije i dalje oglušuju na moja upozorenja o uništavanju prirode i betonizaciji lijepe naše obale, Ja seoski superjunak krenuo sam sa popisivanjem svih neprikladno odbačenih bivših limenih ljubimaca, (broj šasije ili registracije (bez brige sve ću vas ina)), posijanog industrijskog materijala i pogotovo samovoljno izgrađenih nakaradnih potleušica pa čak i lusuznih kuća bez dozvole po našim šumama, gorama, lozijma i maslinicima.Popis popraćen fotografijama i imenima i prezimenima već je odaslan nadležnim institucijama na malo višem nivou, no još uvijek nije kasno očistiti za sobom ostavljeno smeće!!!                                                Misteriozni Botaničar.

NALIK NA IMPRESUM

           LUMBARDANET          UTEMELJENO DAVNE 2005.

                               UREĐUJE I OBLIKUJE:                                            DIZAJN-MENTAL STUDIO “GODINA ZMAJA”

LUMBARDANET JE ISKLJUČIVO VLASNIŠTVO ONIH KOJI OVO PIŠU I ONIH KOJI OVO ČITAJU.